Til hamingju með kreppuna

Ég áttaði mig á því í dag þvílík forréttindi það eru að taka þátt í kreppunni af heilum hug. Þá meina ég að vera ekki fórnarlamb kreppunar heldur vera virkur þáttakandi. Ljósið kviknaði hjá mér þar sem ég sat í kaffistofunni okkar á RE/MAX Borg og borðaði hádegismatinn minn, samloku sem ég hafði smurt mér með einhverju grasi og tveimur ostasneiðum. Ég tók einn bita og tuggði og á meðan ég tuggði hann sá ég hvar glitti í dós af kotasælu í ísskápnum. Ég stóð upp, sótti kotasæludósina og smurði vænni tuggu af innihaldinu ofan á grasið í samlokunni minni og fékk mér í beinu framhaldi annan bita og ég get sagt ykkur það að þetta var algjörlega himneskur biti sem ég tuggði þarna í dágóða stund. Á meðan ég kláraði samlokuna mína, sem ég skolaði niður með kristaltæru kranavatni, varð mér hugsað til þeirra sem hafa sigrast á dauðanum, yfirleitt tímabundið. Samkvæmt sögunum lærir þetta fólk að meta lífið á nýjan leik, ekki ósvipað minni reynslu af kotasælu.

Munið að kreppan er til að taka þátt í og njóta. Hún eykur lífsgæðin okkar, innan frá.

Athugasemdir

[Sigurður Þorsteinsson, 6.5.2008 kl. 22:24]

Skemmtileg nálgun.

[Sigríður Guðnadóttir, 6.5.2008 kl. 22:56]

Góður !  kreppan er hugarástand   og engin kreppa hjá mér !!!!  

[Linda litla, 7.5.2008 kl. 13:47]

kreppa kreppa kreppa... ég er bara svo heppin að ég finn ekki fyrir kreppu.